Thantlang khua i Lai Villa ah hmun a khuarmi SAC palek pathum cu Chinland Cozah ralkap sin ah hriamnam he an zaam i, Lai Villa ah SAC ralkap 12 lawng an taang cang, tiah CNF/CNA nih a chim.
Lai Villa khualbuk ah hmun a khuarmi SAC palek pathum cu September 16 ah meithal zun 4, kuan tampi le a dangdang thilri tampi he Chinland Cozah ralkap sin ah an zaam.
CNF/CNA chimnak nawlngei Salai Htet Ni nih hriamnam he palek pathum an rak zaam, Lai Villa ah SAC ralkap 12 lawng an taang cang tiah Mizzima thawngzamhnak ah a chim.
Thantlang khuachung hmun cheukhat ah hmunhma a lami SAC ralkap pawl cu Chinland Cozah ralkap nih a kulh hna i, sniper pawl nih duhsah duhsah in an ṭhio thluahmah hna, tiah a chim chap.
July 22 in an rak thawkmi Tilim Operation cu atu ah cun thla hnih dengmang a rau cang i, Chinland Cozah ralkap nih Hakha-Thantlang karlak i lungkhar sakhaan le Auto sakhaan pawl an laak khawh cang pin ah Thantlang khua i SAC ralkap sakhaanpi (Kha La Ya 269) zong an rak laak khawh.
