Thantlang in Hakha lei a kal mi Hakha um, Tlangpi khuami Pu Chum Ling motor Chin Taung Tan Bus cu 2020 December 14 suimilaam 7:30 AM tluk ah Pu Thang Hrim Sia zuatnak pawng lamthlang pee 300 thuk ah a tla i minung pahnih nunnak a liam, minung pakua hliam an tuar, tiah theih a si.
“Motor a tlak ning kong hi kan dothlat lio a si. Atu motor tlaknak kong he pehtlai in Palek sakhan ah phungning tein case tuahpiak a si. Hi motor tlaknak ah minung pahnih an nunnak a liam. Minung pakua hliam an tuar i sii-inn ah chiah an si,” tiah Thantlang Palek sakhan riantuan pakhat nih The Hakha Post ah a chim.
Atu motor a tla mi cung ahhin minung 11 an i cit i, hi chung ah minung pahnih an thi. Motor mawngtu Rung Ceu (Kum 20) hi a phei a kiak i, a zualhma ngaingai. Nunnak a liam mi hna hi Thantlang khuasa Nu Siang Tin Thluai le Thantlang Peng Tahtlang khuami Nu Sung Sung hna an si.
Motor tlaknak ruang ah a nunnak a liam mi chungkhar hna cu Chin Ramkulh Cozah nih bulhnak le ngaihchiatpinak ah tangka zong December 14 ah an va pek hna tiah theih a si.
