COVID-19 zawtnak i runven khawh nakhnga ca ah Ngandamnak Zung nih mizapi nih zulh ding upadi a ser mi upadi a zuullomi Thantlang khuachung lawng ah minung 51 Thantlang Peng Biaceih Zung nih dan a tat cang hna.
Hi kong he pehtlai in Thantlang Biaceihbawi Salai Thawngpi nih, “Thantlang khuapi COVID-19 zawtnak in i runven khawh nakhnga Cozah nih upadi a ser mi, zulhphung a ser mi kong he pehtlai in mizapi sin ah thla khat chung hrawng fimchimhnak tuah a si. Atu dantat mi hna hi mask aa hup lo mi le kuthrolh aa hrolh lo mi an si. A voi khatnak ah minung 26 le a voi hnihnak ah minung 24 Thantlang Peng Biaceih Zung nih minung pakhat ah Ks.5,000 cio dan a tat hna. Ks. 5,000 dantat mi zong hi Cozah sin ah a lut lai,” tiah The Hakha Post ah a chim.
Atu bantuk in dantat a tuar mi hna hi Chonhbarh khawh mi zawtnak khamnak le Dohdalnak Upadi Pohma 15 ning in dantat an si. Pohma 15 ah mi zeihmanh kha dal 4nak ning in Ngandamnak Minister Zung le Ngandamnak Zung i thil tuahnak pakhatkhat kha zuul loin nawl a buar a si ahcun, Ks.5,000 nak tam lo dantat khawh siseh tiah aa tial.
Photo/Iprd Thantlang
