Thantlang khua tungvang sersiamnak (Thantlang Town Plan) cu Nay Pyi Taw in khua sersiamnak lei a thiam mi minung pasarih he rian umtuning suaisam cuahmah a si, tiah thawng kan theih.
Thantlang khua tungvang sersiamnak rian umtuning suaisamtu ding ah sawm mi minung pasarih hi Myanmar ram Vice President-2 Pu Henry Van Thio nih Nay Pay Taw Oo Eain Zung ah khua sersiamnak lei a thiam mi bawmh a hal mi an si, tiah kan theih.
“Kanmah tein khua tungvang sersiamnak rian umtuning suaisam hi kan thiam sual lai lo, kan i palh sual lai, ti kan phang. Cucaah, Pu Henry Van Thio nih hi bantuk in bawmh a kan halpiak hi a si. Hawi khua le ram a tluk ve mi khuapi si ve kan duh,” tiah Thantlang Sipin Committee Chungtel Pu Obed Nawl Ceu nih The Hakha Post ah a chim.
Nay Pyi Taw lei in khuapi sernak lei rian a thiam mi minung pasarih cu May 27 ah Thantlang khua an phan cang i zarh hnih chung khua tungvang suaisamnak an ngei lai, tiah kan theih.###
