Ni hin February 25, Thantlang khua chung SAC ralhraang le Chin ralkap hna kar kahdohnak ah Chin ralkap pahnih nih ram le miphun ca ah an nunnak an pek tiah kan theih.
Thantlang kahdohnak ah ram ca a nun a pe mi hna cu CNA ralkap Salai Zachariah le CDF-Thantlang ralkap Salai Lian Bawi Ceu an si tiah kan theih.
Kahdohnak cu zinglei suimilaam 4:00 in aa thawk i SAC ralhraang nih raltuknak vanlawng hmang in bomb voi 15 nak tlawm lo a thlak hna pin ah raltuknak helicopter Mi-35 hmang in SAC nih Chin ralkap a kah hna tiah kan theih.
“Zinglei 4:00 in an kan kah i vanlawng in bomh voi tampi a thlak. Atu tiang hi kan i kap cuahmah ko. Kanmah lei in pahnih nih ram ca ah nunnak an pek. Annih lei zong a thi mi an tampi lai,” tiah thawnghram nih THP ah a chim.
Chin ralkap lei zong nih drone hmang in SAC ralhraang pawl an umnak zawn ah bomb an thlak ve i ralhraang lei a thi mi le hma pu an tam kho tiah kan theih.
“Drone in an umnak eekinn choi lak in bomb kan thlak. Cuka zong ah a thi mi an tam lai ti kan zumh,” tiah thawnghram nih THP ah a chim.
SAC ralhraang pawl nih fekthup in hmunhma an rak laaknak Thantlang palek sakhan cu CNA, CDF phu komh nih an laak hnu in SAC lei nih Thantlang khua chung control dih khawh nakding fakpi in an i zuam. Helicopter in
thazaang tampi an i chap in Thantlang khua chung ah van lei he, ke ralkap he fakpi in kahdohnak an tuah pin ah Hakha hrambunh SAC ralhraang pawl zong nih miakpi in nifatin kah an bawmh hna.
