Thantlang khuapi chung hmun zeimawzat ah CCTV an bunh, tiah October 30 ah theih a si. Thantlang peng Sipin lutlai Pu Van Za Uk nih, “Thantlang khua chung CCTV bunh dingmi hi Sipin budget in tawlrel mi a si i, tutan ahhin tangka sing 99 budget a tla. Khua chung ah CCTV kan bunhnak sullam cu, mifir kut in i runvennak, mitha lo hna kut in i runvennak le motor le motorcycle in i khawndennak hna a um tik ah, fiang tein a ruang theih khawh nakding le hmuh khawhnakding kan duh caah a si,” tiah The Hakha Post ah a chim.
Thantlang khua chung zei bantuk hmun deuh ah dah CCTV cu bunh an timh timi kong ah “CCTV kan bunh nakding hmun hi hmun 13 ah kan zoh chung nain a herh ning in tawlrel a si than te lai. A hleikhun in, khuachung lamtonnak deuh ahhin bunh kan timh chung rih. Hihi, Myanmar ram Vice President Pu Henry Van Thio a voi hnihnak Chinram a tlawn lio ah rak halmi a si,” tiah Thantlang peng sipin lutlai Pu Van Za Uk nih The Hakha Post ah a chimchap.
