Thantlang khuachung kahdohnak ah SAC ralkap Lieutenant Colonel rank le palek bawi pakhat tel in ralkap 10 an thi, tiah CNF/CNA chimnak nawlngei Salai Htet Ni nih a chim.
November 1 in 7 karlak ah a cangmi kahdohnak ah SAC ralbawi tel in ralkap 10 an thih hi a si i, SAC drone pakhat zong Chinland cozah ralkap lei nih tla lak in an kah, tiah theih a si.
Salai Htet Ni nih, “Thantlang khuachung ah pehtlai in kahdohnak a um. Anmah lei in Lieutenant Colonel pakhat le palek bawi pakhat tel in ralkap 10 an thi. An ralbawi Lieutenant Colonel hi kanmah lei sniper nih a kah. Kanmah lei in i hliamnak tlawmpal a um ve,” tiah Khonumthung ah a chim.
Thantlang SAC ralkap bawi Lieutenant Colonel hi NLD zung ah a ummi a si i, Chinland cozah ralkap lei sniper nih a kah caah a thih hi a si.
November 5 zong ah Thantlang khuachung ah naihniam tein i kahdohnak a chuak i, palek bawi pakhat tel ralkap cheukhat an thi.
SAC ralkap pawl cu Thantlang Tatkung, NLD zung le Palek zung tel in khuachung inn pawl ah hmunhma an la hna, tiah thieh a si.
