Thantlang khua chung innlo hna hi aalo mi muici pakhat (one colour system) si kho ding chunmang kan ngei, kan tlamtlinh khawh fawn ko lai, tiah Thantlang Sipin lutlai Pu Van Za Uk nih July 16 ah a chim.
“One colour system kan ti duhnak cu kan inn a di kan cih mi caanphio pawl hi a muici i khat dih. Vaam kan chon mi hi a raang a si ahcun raang dih, a sen a si ahcun sen dih, tibantuk khi chim duh mi a si. Thantlang khua hi Myanmar ram lawng si loin vawlei cung tiang in khua phundangte a sinak langhter khawh a si. Cu rian cu kum khathnih ah kan tlamtlinh khawh ding mi a si lo nain rian har tuk zong a si lo. Inn sak ding a rak sok mi kha cu bantuk di na cih lai, vaam sii na thuh lai, tibantuk in kan chimcia hna lai i kum zeimawzat ah cun kan tuah khawh ko lai,” tiah Pu Van Za Uk nih The Hakha Post ah a chim.
Hi kong hi khuami nih duhlo sual hna sehlaw tah, a har tuk lai ti sual hna sehlaw zeitin tiin kan hal tik ah, “Thantlang hi khua dang bantuk an si lo. An lung aa rual. Tanrualnak lungput an ngei. Khrihfabu lei zong nih kan riantuannak thazaang an kan pek. Khuanu Khuapa le Zaatlang phu tibantuk zong nih thazaang an kan pek tik ah riantuan a nuam i atu kan saduhthah zong hi kan tuan khawh ko lai. Thantlang khua hi phundangte a sinak le khuadawh a si khawh ding cu ahopoh nih an duh dih ko lai,” tiah a chimchap.
Thantlang khua cu Chin Ramkulh Cozah nih Chinram khua lak ah khua dawh bik, khua thianghlim bik ah a rak thim bal mi khua a si. Sipin nih khuachung muisam, lam muisam, innlo muisam dawhter chinchin ding in rian aa hmaithlak, tiah kan theih.
