Malaysia ram ah inn cung in a tla i a nunnak a liam hnu, Thantlang ah ruakvui ding in an rak tlunpi nain Thantlang Peng chung COVID-19 zawtnak lei rian ngei upa hna nih khuachung ah luhter an duh lo i, lamkam ah ruak vuiter a si mi Mai Sui Hlei Tial (kum 21) upa bulhnak cu tangkafang in sing 900 fai a chuak tiah theih a si.
Mai Sui Hlei Tial bulhnak ca ah tangka a tho mi hna hi America, Norway, Australia, Denmark, Malaysia, China, New ZeaLand, ramchung ramleeng, Pu Cung Hu, Dr. Hre Mang (USA) hna hi an si.
Mai Sui Hlei Tial he chungkhat a si mi Pi Ni Len nih, “Bulhnak tangka hi a dihlak in a chuak mi sing 900 fai a si. Hi bulhnak tangka a chuak mi zong hi Sui Hlei Tial i hringtu a nu inn saknak ca ah kan hman lai ti hi kan i ruahmi a si. Aruang cu an inn hi a chia cang, thlam bantuk a si. Cun, a nu zong hi kum 40 lawng a si ko nain, a cuap lei damlonak zong a ngei i, atu le tu sii-inn ah kal a hau peng mi a si. Atu bulhnak tangka hmuh mi chung in sing 300 man inn kan cawkpiak hna lai,” tiah The Hakha Post ah a chim.
Mai Sui Hlei Tial hi 2020 September 29 zaan suimilaam 9:00 tluk ah Malaysia a umnak dot 9 sang inn cung in a tla i a nunnak a liam. A ruak hi 2020 October 3 ni ah Yangon International Airport a phan. 2020 October 4 zaan ah Thantlang a phan i, Thantlang peng chung Cozah rianngei hna nih an luhter duh lo ca ah lamkam ah a ruak an vuiter hna. Asinain, mizapi le media hna bawmhnak thawng in lamkam a ruak an vui mi cu an laakter than hna i 2020 October 6 Thantlang thlan ah an phumter than hna.
Chin Ramkulh Cozah lei nih Sui Hlei Tial a ruak lamkam an vuiter mi hna kong he pehtlai in, “dawtnak le zawnruahnak in kan tuah mi a si,” tiah lehnak an tuah nain mizapi le chungkhar hna nih an cohlang duh lo.
