Thantlang CND nih Thantlang Peng Thanchonak Bu a hrin
A kum 72nak Chin Miphun Ni Thantlang ah tuah mi a lak si lo in Thantlang peng ca ah tuanbia le man a ngeih khawh nakding ca ah tiin Thantlang Khuanu Khuapa tawlrelnak in February 21-22 TBC Hall ah Thantlang Peng Thanchonak Kong seminar an tuah mi nih Thantlang Peng Thanchonak Bu (TPTB) an dirhcolh.
“Tutan ni hnih chung ceihmai mi chung in biafunnak tuah mi tuanchuah khawh nakding le hmailei ah hi bantuk seminar hi pehzulh in tuah khawh nakding ah tiin Thantlang Peng Thanchonak Bu (TPTB) dirh siseh,” tiah biachanhnak an tuah.
“TPTB Main committee ah aa tel ding riantuantu hna cu Thantlang Khuanu Khuapa nih tuanvo la hna sehlaw, a ralai mi March chung ah kapkip a huap kho mi riantuannak bu, phu le ramleng lei tiang i tel in kan serpiak hna seh,” tiah tuanvo pek an si.
Tutan seminar ah ruahnak cathluan chuahpitu hna cu: Dr. Sui Khar, Pu Za Bik, Pu Za Ceu Lian, Dr. Tluang Za Thang, Si Bawi Mang Lian, Salai Van Biak Thang hna an si.
Hi seminar cu ni hnih chung an tuah i upa zakhat leng an kai. Hi chung ah ramleng in Thantlang Chin Miphun Ni hman le chungkhat tlawn ah a rak tlung mi upa hleinga hrawng an i tel i cu hmanh ah cun Australia in a rak tlung mi an tam.
