Thantlang Christian Fellowship (TCF) nih zu a zuar mi innchungkhar thihloh an ton tik ah Khrihfabu kip Pastor te nih an ruak vui lo ding, ti mi biahchahnak cu TCF nih a pehzulh, tiah kan theih.
Zu a zuar mi innchungkhar thihloh an ton tik ah an ruak vui lo ding ti mi biachahnak hi Thantlang khua Khrihfa kum 100 tlinnak Jubilee ah biachahnak rak tuah mi a si.
“Khrihfabu chung ah zu zuar an um ahcun member in chuah i Khrihfabu nih an ruak vui lo ding a si. Khrihfabu pakhat in an chuah hnu zong ah Khrihfabu dang ah luh khawh a si lo. Khrihfabu komh in dirh mi TCF a si ca ah khoika Khrihfabu le Pastor hmanh nih member ah cohlan le ruak vui khawh a si lo,” tiah Thantlang Christian Fellowship Chairman Rev. Dr. Duh Sang nih The Hakha Post ah a chim.
Thantlang Christian Fellowship cu 1999 ah Thantlang Christian Minister Fellowship tiin rak dirh a si i kum zeimawzat a rauh hnu ah Thantlang Christian Fellowship, tiah min thlen than a si.
