Thantlang Buva dinti laak mi cu zatuak zatceo renglo lim a si cang i September thla chung ah hman khawh a si cang lai, tiah Thantlang Sipin lutlai Pu Van Za Uk nih a chim.
Hi dinti laak nakding ah Myanmar ram Vice President-2 Pu Henry Van Thio nih tangka sing 510 bawmhnak a pek hna. Cirik a kai kho lo mi thir pipe thluan 1400 cawk a si i 990 a phan cang. Tikhur zong tuah cuahmah a si i a rauhhlan ah hman khawh a si cang lai, tiah kan theih.
“Hi dinti laaknak hi pawngkam runvennak budget in pek mi a si. A ngaingai cu Penguk (twe-oh) tlaih mi a si nain Sipin nih tuanchuah rian kan tlaih mi a si. Sipin ca ah a miakmai um bak lo in a that khawh chung tha in kan tawlrel mi a si,” tiah Pu Van Za Uk nih The Hakha Post ah a chim.
Hi Buva dinti laak mi hi Thantlang khuapi dihlak ca ah si loin khua kauhchap mi, Lahva lei, Hotel Zone hmun hrawng ca ah laak mi a si. September thla chung ah hman khawh a si cang lai, tiah kan theih.
