2020 Marh thla hrawng in aa thok mi vok zawtnak in Thantlang khua chung ah vok 300 leng an thi cang i, Thantlang ah vok thah lo ding, voksa zuar lo ding le ei lo ding in Agriculture, Livestock, Forestry and Mines Minister Zung nih thawng a thanh, tiah kan theih.
Hi kong he pehtlai in Thantlang No.1 Khuabawi Pu Van Thlir nih, “Vok hi Thantlang khua chung Sang kip ah nifatin an thi peng ko. Sang khat ah vok zeizat dah an thi ti cu dikfel in ka chim kho lo nain vok 100 renglo cu an thi ko. Vok hi zei zawtnak in dah an thih ti hi kan thei lo. Vok khat hnih an thih khan Thantlang sathil thlopbulnak Zung ah thawng kan thanh i, sii zong Mandalay ah aa kan cahpiak ko. Cu sii cu No.1 Sang ah hin vok 700 hrawng an chunh hna i a dammi zong an um. Cheukhat cu an thi thiamthiam. Atu tiang ah Thantlang khua pumpi ah vok 300 leng cu an thi cang,” tiah The Hakha Post ah a chim.
“Agriculture, Livestock, Forestry and Mines Minister Zung nih ca an chuah i an kan pek mi cu, hi vok zawtnak hi, hmaihu virus 2 nak a si an ti. Cucaah, ahohmanh nih vok hi thah i, sa zuar le ei lo ding in an thanh. A thimi zong kha sala-aih in nan khumh lai i, nan phurh tik zong ah leng lang in phurh loin khua leng ah khur chung ah nan phum lai. Cun, nan phurhnak motorcycle le motor zong thiang tein sapiat in nan tawl lai i, rungrul thahnak sii nan kah lai. Vok a phumtu le vok rawl a petu tibantuk zong thiang tein nan thil nan suk colh lai ti a si. Atu hi aa kan ti bantuk in May thla dih tiang tlang kan au peng ko lai. Cu lawng si loin Thantlang Peng khuate lei zong ah an thi ve thiamthiam. A zaw i a dam than mi cu tlawmte lawng an si. Zawtnak an i chonh ning hi thopaw, ar le vok rawl a pe mi hna an thilpuan zong in i chonh khawh a si an ti i, a damnak sii zong a um bak lo ti a si,” tiah Pu Van Thlir nih a chimchap.
Hi vok zawtnak aa thok ning hi fiangfai in theih a si rih lo nain Kawl lei in an rak tlunpi mi hna kha Lahva ah an chiah hna. A cheu cu an zaw i an thi. A dang a dam mi kha an thah i an zuar. Cun, an rak tlungpi mi hna zong a um i, cuticun aa thok mi a si, tiah ruah a si. Vok an zawt ning hi an buanbara hna a tawh, an hnakhaw hna in tihang bantuk a chuah, a cheu cu an hnar in thi hna a chuah. Vok thih hram an rak i thok hi March hrawng in a si cang i, atu tiang an thi peng ko, tiah kan theih.
Photo/Van Leng Mang
