Thailand ram mizapi nih “kan cozah nih COVID-19 raikhamsii chuahnak ah a hnuar tuk” tiah mawhphurhnak a san lingcing ah tu bantuk in Thai cozah nih a ra lai mi thla in AstraZeneca company ser COVID-19 raikhamsii cu chunh hram thok ding ah January 25 ah thanhnak a tuah tiah theih a si.
Thai cozah nih thawngthanh ning ah papek in COVID-19 raikhamsii chunh ding mi hna cu kum upa hna, COVID-19 zawtnak a karhnak bik hmun ah ngandamnak riantuantu hna le caan sau zawtnak a ngei cang mi hna hi an si lai tiah theih a si.
Thai ram ngandamnak lei zung nih kan hnu zarh ahkhan AstraZeneca company ser COVID-19 raikhamsii hi hman khawhnak nawl a rak pek. Nain China ser Sinovac Biotech COVID-19 raikhamsii hi hlankan in cozah nih sing 2 a rak i cah cia nain hmannak nawl pek a si rih lo tiah theih a si. Thai cozah nih AstraZeneca COVID-19 raikhamsii hi sing 2 cah a si nain sing 150000 lawng kha kuat hmasa a si lai tiah Thai ram ngandamnak zung lutlai a si mi Anutin Charnvirakul nih cacawn ni khat ni ah a chim tiah kan theih.
Thai cozah nih COVID-19 raikhamsii hi 1 million tluk cah ding in timhlamhnak zong a ngei tiah theih a si. Thai ram chung ah COVID-19 zawtnak a karhnak bik hmun ahhin kawlram mi riantuan zong tam cem an umnak a si tiah theih a si. January 25 tiang cazin ning incun Thai ram chung ahhin COVID-19 zawtnak ngei hi minung 13687 an si i COVID-19 zawtnak in a thi cang mi hna hi minung 75 an si cang tiah theih a si. (Ref: VOA)
