Thailand ram ah motor accident in a thi mi Chin mino pathum hna ruak cu caan zeimawzat a rauh hnu 2023 May 16 ahkhan an ruak thlan a tla cang tiah Chin Community, Bangkok tuanvo ngeitu sin in thawng kan theih.
Ram buai ruang ah Malaysia lei kal aa timmi hna i an motor cit mi cu 2023 May 5 ah, Thailand ram le Malay ramri ah a um mi Naratihwat khua ah aa leh caah Chin mino pathum nunnak a rak liam. Motor hi pahnih a si i pakhat ah minung 15 le pakhat ah minung 10 an i cit i a tam deuh hi cu Chin mino deuh an si.
“Motor hi pahnih an si i minung 15,10 tiin an i cit. Minung 15 nih an i cit mi, hmai a sa mi motor hi aa let mi cu a si. Minung 10 a phor mi motor (A hnulei kal mi) hi a hmai kal mi motor aa lehnak hmun ah Thailand Cozah lei rian ngei hna nih an tlaih ve hna. Chin mino 20 an i tel. Hliam a tuar mi pathum zong an um i atu hi an ngandamnak ruang ah Cozah nih sii-inn ah an chiah lio hna a si,” tiah CCB Chairman Pu John Tluang Cung nih THP ah a chim.
Motor accident in a nunnak a liam mi hna cu Salai Setha Solo (Hlama) Salai Thu Rein Tun (Paletwa) le Leeng Singomi Fachhai (Ngaphaipi) hna an si.
An ruak vuinak kong he pehtlai in, “An ruak hi Australia an chung le he i bawm in vui an si cang,” tiah Pu John Tluang Cung nih a chimchap.
Atu Thailand cozah kuttang ah a um mi hna hi a tam deuh cu Myanmar ram lei ah an kuat than cang hna. Cun, hliam a tuar mi Chinmi pathum hi Mara lei an si tiah kan theih.
