Thailand-Myanmar ramri, Karen ramkulh chung kahdohnak ruang ah SAC ralkap 45 cu nihin March 19 ah Thailand ramchung ah an zaam, tiah theih a si.
A zaam mi SAC ralkap pawl hi Thailand-Myanmar ramri Maytharawkhi SAC ralkap sakhaan ah a um mi an si i, Thailand ramchung Paingkhalan ti mi khuate ah an vung zaam, tiah Karen Information Center (KIC) nih a langhter.
A luancia ni tlawmpal zong ah khan Karen ramkulh, Dupalar Distric chung ah a um mi Kyeikdung SAC ralkap sakhaan in ralkap 66 nih Karen hriamtlai KNLA sin ah hriam an chiah, tiah KIC nih a ṭial.
2023 kum donglei in ramri SAC ralkap sakhaan pawl cu tlangcungmi hriamtlai hna le Dohthlengtu ralkap bu hna nih pehzul in an laak thluahmah caah India, Tuluk, Bangladesh le Thailand ah SAC ralkap tampi an zaam cang.
