Thaal a chuah cang bantuk in Hakha Peng Meithat Zung nih khuacaan dang nakin mei ralrinnak papek in an tuan cuahmah tiah, tuanvo ngeitu sin in March 6 ah thawng kan theih.
“Khuacaan dang le thla dangdang hna zong ah mei ralrinnak cu kan tuah lengmang ko. Amah belte, thaalcaan cu a linsa i meikaang a tam khun tawn ca ah papek deuh le biatak deuh in thaalcaan ah kanmah Meithat Zung zong kan i ralring i mizapi zong nih i ralrin deuh a herh,” tiah Hakha Peng Meithat Zung Lutlai Pu Ca Zung Mang nih The Hakha Post ah a chim.
Hakha, Thantlang le Chinram ah siseh, khoika ram hmanh ah thaalcaan hi a linh caan a si bantuk in meikaang a tam bik caan a si. Hihi, inn ngeitu daithlaan ruang ah a chuak mi a si i, “Daithlaan meikaang,” tiah min zong an bunh phah mi a si.
“Kanmah cu ready (standby) in kan si peng. Mei ralrinnak kong zong khua kan au lengmang. Dawrkhaan, khualbuuk, Bank le boarder tibantuk tiang in fimchimhnak le chekhlatnak zong kan tuah. Atu hi taanghra camipuai phi ding an si ca ah khua-au kan duh nain an dih hnu lawlaw ah kan au te lai. Hihi kanmah rian lawng a si lo. Inn ngeitu le mizapi nih mei cu tih a nun bantuk in kan i ralrin cio a herh. Cun, thaalcaan ah ram meiduah a tam ngai. Hihi duah an duh ahcun tha tein kan chim hna sehlaw minung thazaang le thil umkal ning tiang fimchimhnak zong kan ngeih hna hnga,” tiah a cunglei upa nih a chimchap.
Hakha khua ah Pengkomh le Peng nih Meithahnak-seh 9 an ngei i riantuantu minung 45 hrawng an si, tiah kan theih.
