Tender cuh ding ah aa tel mi Company paruk hna nih Thantlang Peng, NLD teinak hmuh nakding ca ah tangka an thawh mi cu party chairman lungtlinpinak min senthut mi ca Online ah a langmi kong he pehtlai in Chin Ramkulh NLD party teinak hmuh nakding committee nih zohfelnak tuah ding in 2020 November 27 ah ca a chuah.
Online i a langmi ca chung ah Thantlang Peng, NLD party Chairman i minsen thut mi aa tel i Fim Cawnnak Zung ,Tender aa cuh ding company paruk le an company min tiang in aa tel. Hi company a ngeitu hna nih Thantlang Peng NLD party teinak an hmuh nakding ca ah tangka an thawh mi zat zong aa tial dih.
Hi kong he pehtlai in Chin Ramkulh NLD party teinak hmuh nakding committee lutlai Salai Isaac Khen nih, “Anmah lei zong nih NLD party hi an dirpi. Kanmah nih rak kan pe uh ti cu a si lai lo dah. Hi kong ahhin kanmah lei nih a ran khawh chung in, kan tawlrel lai. Party General lei zong nih Ramkulh lei nih tawlrel ding le hmalaak ding in nawl an kan pek cang. Rianrang in kan tawlrel lai,” tiah The Hakha Post ah a chim.
Atu kong he pehtlai in Chin Ramkulh, NLD teinak hmuh nakding committee zong nih cathanh an chuah. Hi cathanh an chuah mi chung ah, “Hi kong hi zohfelnak kan tuah i, zohfelnak kan tuah mi zong Bahu ah kan kuat cang. Ca chung ah aa tel i, minsen a thu mi Party Chairman tu hi cu Peng party hna nih tuanvo laak ding, nawl pek ning in Ramkulh party rian ngei hna nih tuanvo laak a si lai tiah aa tel,”.
Cun, Chin Ramkulh Cozah lei zong nih , Tender zulhphung ning in hma laak ding kong zong party sin thawng an thanh tiah aa telchap.
Atu tangka aa thawh mi company 6 chung ah company pahnih hi register an ngei rih lo tiah DICA nih a langhter. Cun, hi hna company chung ah NuNu Company chungtel chung ah Thantlang Peng, NLD secrtaey Pu Phun Lian Hre zong aa tel tiah DICA nih a langhter.
