Tender a hmu rih lo mi zawnruah le a hmu cang mi an riantuannak zoh in tender kan pek lai: Minister Salai Isaac Khen

Chin Ramkulh Sipin Zung nih tender auh mi chung ah tender a hmu rih lo mi zawnruah i a hmu cang mi hna riantuannak zohchih in tender pek a si lai tiah Chin Ramkulh Sipin Minister Salai Isaac Khen nih a voi hnihnak Tender honnak May 15 ah a chim.
“2018 September thla tiang budget in a voi hnihnak tender hi Chin Ramkulh Peng 13 ah a tla i cu chung ah Company 93 nih nan sok. Tutan hi a hlan a rak sok ko nain a hmu lo mi zawn ruah chih le a hmu cang mi hna dirhmun, sining, mark zoh in kan pek lai. Tender cu zapi nih sok cio a si bantuk in uting nauzo in tender pek kan duh. A hmu cia mi lawng te nih hmuh peng si lo in phawtzamh in pek nan si lai. Asinain mark a tha lo mi cu pek awk a tha hlei lai lo. Tender zulhphung a zul i mark a tha mi kan pek lai,” tiah Minister Salai Isaac Khen nih a chim.
Minister Salai Isaac Khen nih atu bantuk a chim mi kong ah biahalnak zong a tuah i zapi nih an lungtlin ca ah biahalnak pakhat hmanh a um lo.