Chin Ramkulh Tedim Peng sii-innpi ah COVID-19 zawtnak in sii-inn ah an chiah mi Case No.1 Pa Tuang Suan Khai cu voi hnih tiang a thi an check than i a phichuak Negative in a chuah ca ah sii-innpi in 2020 April 30 suimilaam 10:00AM ah a chuak tiah kan theih.
COVID-19 Case No.1 hi 2020 April 24 ni ah voi khat, 2020 April 29 ni ah voi khat a zawtnak an check i a phichuak negative in a chuah ca ah atu bantuk in ngandamnak lei tuanvo ngei hna nih a dam cang an ti i, sii-inn in an chuahter hi a si.
“2020 April 29 chun ah a phi chuak hi kan theih i kan i lawm taktak. Anih hi Myanmar ram chung le Chin Ramkulh chung ah zawtnak hrik ngei hmuh hmasa cemmi a si. Cun, Chin Ramkulh chung ah zawtnak in a dam hmasa cemmi a si. Voi hnih tiang a phi chuak mi a that lei a panh ca ah atu bantuk in sii-inn in chuahter a si. Case No. 1 nih hin Chin Ramkulh chung ngandamnak lei rianngei le upa dangdang zong fim an kan chimh, an kan cawnpiak tuk. Kapkhat lei in ruah ahcun a thatnak tampi a um ve. Atu bantuk in damnak a hmuh than ca ah amah zong aa lawmh bantuk in mizapi zong kan i lawm cio theu lai ,” tiah Minister Pu Pau Lun Min Thang nih The Hakha Post ah a chim.
Case No.1 hi sii-inn in an chuahter cang nain i ralrinnak ca ah tiin Quarantine ni 7 chung chiah a si rih lai. Ni 7 chung ah that lei a panh chin vima a si cun a duhnak hmun poh ah phung ning tein kalter a si cang lai tiah a chimchap.
Tedim sii-innpi ah COVID-19 zawtnak in thlop a si mi minung 5 an si i, minung 5 chung ah atu case No.1 lawng a phichuak Negative a si i, Tedim sii-innpi ah atu hi minung 4 an chiah rih hna. 2020 May slm 7:00AM tiang Ramkomh Ngandamnak le Zaanglek Zung nih Myanmar ram chung COVID-19 hrik ngei minung 151,, damnak a hmu than mi minung 16 le zawtnak in a thi mi minung 6 an si cang tiah a thanh. Cun, Chinram chung lawnglawng ah COVID-19 zawtnak hrik ngei Case No.1 telh loin minung panga an si tiah kan theih.
Photo/ Sayamah Zam Cing
