Chin Ramkulh, Tedim Sii-iin ah COVID-19 zawtnak hrik an hmuh mi pa sin ah Chin Ramkulh Cozah Minister cheukhat an va kal i, tangka sing 5 bawmhnak an va pek, tiah kan theih.
Hi kong he pehtlai in Chin Ramkulh Cozah Social Affairs Minister Pu Pau Lun Min Thang nih, “Mizaw ca ah Cozah nih tangka sing 5 bawmhnak kan pek. Atu Sii-inn mizaw an chiah mi a dirhmun hi a tha ko. A dam tuk ko. A hmun ah va zoh awk a that lo ca ah, Phone in Video call zong in kan i chawn ko. Cun quarantine (leng chuak lo ding in) kan chiah mi hna zong inn ah tha tein kan umter hna i, naihniam tein kan zohkhenh ko hna. Lock Down kan tuah mi hna Kaptel khua zong March 26 ah Ngandamnak Zung lei in Phu khat an va kal i, virus thahnak sii zong an va toih cuahmah, tha tein kan zohkhenh ko hna,” tiah The Hakha Post ah a chim.
2020 March 25 ah Chin Ramkulh Cozah Social Affairs Minister Pu Pau Lun Min Thang, Minister of Agriculture, Livestock, Forestry and Mines Pu Mang Hen Dal, Chin Ramkulh Cozah Zung tuanvo ngeitu hna le Ngandamnak Zung tuanvo ngeitu hna nih Tedim Sii-inn ah an chiah mi mizaw cu an va zoh, tiah kan theih.
