Chin Ramkulh, Tedim Peng, Khaikam khuapi chung i Thingram lei zung hmun ah inn a sa i, khua a sa mi inn 26 hna cu phung lut loin an um ca ah tiin Thingram zung lei nih September 25 ah thehter an timh hna tiah thawng kan theih.
Khaikam khuapi, No.4 sang, Kuaitan hlei tanglei ah a ummi inn 26 hi a dihlak in September 25 ni ah hrawh dih dingin nawl an chuah ca ah khuami hna thialkamnak tuah ding ah an lungre a thei, harnak an tong tiah kan theih.
Hi kong he pehtlai in inn hrawhpiak ding a tongmi Pu Thang Lam Mung nih, “Hi buainak hi a liamcia kum 2019-2020 in Thingram lei zung he buaihram kan i thok cang. A voi khatnak ahhin a herh mi ca pawl kan kuat. A voi hnihnak ah anmah lei nih hrawh dih ding in nawl an chuah. Kanmah leikap zong nih hi buainak hi kan i harh tuk ve ko. Kanmah lei zong kan tlamtlin ko a si ah cun, Cozah he buai hi kan duh bak ve lo. Kanmah tein kan tuan kan kawl i, kan ei nain atu ahcun COVID-19 nih a kan phak tik ah eidin lei zong a dangdang zong harnak kan tong. Kan inn hi hrawk tak ko hna hmanh sehlaw sak than ding ahcun kan har tuk tik ah keimah lei dirhmun in cun a thatnak in kan tawlrelpiak kho hna sehlaw ti ka duh ko,” tiah The Hakha Post ah a chim.
September 15 ah inn hrawh timh tong mi chungkhar hna cu KoMile Thingram Zung nih an auh hna i biahalnak zong an ngei tiah thawng kan theih.
Biahalnak an ngeih mi kong he pehtlai in, min langhter duh lo pakhat nih, “Thingram lei zung nih an kan auh. Kan nulepa min, kan NRC le zeitik kum indah hi hmun ah kan um ti pawl an kan hal. Kanmah leikap zong nih i thialkam cu kan duh ko nain thialkamnak ca ah hmun kan i hmuh lo lawng si loin harnak tampi kan ngei. Rampi zong nih thialkaamnak ca ah hmun kan i hmuh hlan tiang hi cu um khawhnak nawl kan pe hna sehlaw ka duh hringhran ko,” tiah The Hakha Post ah a chim.
Hi kong he pehtlai in Khaikam Thingram Zung lei ah pehtlaihnak kan tuah nain kan pehtlaihnak an cohlang duh lo.
Atu inn thehter ding mi hna hi 2015 kum Khaikam khuapi ti lian a rak tlun lio ahkhan No.4 sang Khuai Tan hlei chaklei lei hi a rawk ngai. Chaklei hi a rawk ngai ca ah tilianh ruang ah harnak a tong mi hna umnak ca ah tiin Cozah lei nih hmun an pek mi hna a si tiah kan theih.
