Tedim peng, Mualpi khua ah SAC ralkap pawl nih kum 12 lawng a si rih mi ngakchia nu an tlaihhrem, tiah theih a si.
Kalay in Chinram lei ah a rak kai mi SAC ralkap pawl cu July 5 ah khan Tedim peng Mualpi khua ah an phan i, ralkap cheukhat nih kum 12 ngakchia nu cu an tlaihhrem, tiah Chin World nih a ṭial.
Tualchungmi pakhat nih, “July 4 ah khan SAC mawtaw tlar cu Chinram lei ah an rak kai tiah thawng a leng i, ngakchia nu le a chungkhar hi lo ah an zaam. July 5 ah inn tlun a ngah cang an ti i, ngakchia nu cu a nu nih inn va zoh ta ding in a tlunter. Ngakchia nu nih an inn ah rawl a chumh lio ah cun SAC ralkap pahnih an lut i an tlaihhrem. Ngakchia nu a au len ko nain pawngkam a um mi SAC ralkap dang zong nih an va zuan hnawh lo,” tiah a chim.
“Khua upa cheukhat nih SAC ralbawi an ton i thil sining an report nain tangka pek in i ngaihthiam ding in ralkap lei nih an i zuam. Tlaihhremtu ralkap pahnih cu puan in an tuam hna i, mawtaw cung ah an khin hna,” tiah a chim chap.
Kalay in Chinram lei ah mawtaw paruk in a rak kai mi ralkap pawl cu mah ni ah cun Kalay lei ah an kir ṭhan, tiah theih a si.
