Nihin January 11, chunhnu sml. 1:15 hrawng ah Tedim peng Laitui khualeng ah ZRA le CNA kar kahdohnak a chuak, tiah thawng kan theih.
“Laitui khualeng ah suimilam pahnih chung hrawng an i kap. CNA lei cun hmapu le a nunnak a liam mi an um lo. ZRA lei zeidah an lawh timi zong theih a si ve lo,” tiah CNA he naihniam pakhat nih a chim.
CNA ralkap pawl Laitui khua ah thil cawk ding in an kal lio ah ZRA nih an rak kah hna caah kap hnih karlak kahdohnak a chuah hi a si.
Kahdohnak a dih hnu ah CNA nih pawngkam thianhnak an tuah i ZRA hriamtlai pawl nih an zaam taak mi puan, bag le ralkap thilthuam tibantuk an hmuh.
ZRA lei zong hmapu le a thi mi an um lo, tiah Tedim ca in ṭial mi tualchung thawngzamhnak pawl nih an langhter ve.
