A ralai ding November 8 ah tuah dingmi 2020 kum Myanmar ram thimnak ca ah Tedim Peng ah mibu in an um lo nakding ca ah tiin mee zung hmun 9 ah an chap lai i, cun ramkheel party 7 an i zuam hna lai tiah thawng kan theih.
Tedim Peng chung 2019 mipum ning in mee zung hmun 131 lawng hon ding in timhlamhnak an rak ngei. Asinain COVID-19 zawtnak ruang ah hmun 9 chap than an timh tiah theih a si.
Tedim Peng Election Commission zung then i Lutlai Pi Cing San Kim nih, “Mee zung kan chap than ca ah mibu in um timi a um tuk theng ti lai lo. Kanmah rian ngei lawng si loin zaanghlei cawi in riantuan ding ah minung zong kan sawmchap hna lai. Mee cazin zong mee zungkip ah kan langhter lai. Cun, Facebook cahmai zong ah langhter a si lai,” tiah The Hakha Post ah a chim.
Tedim Peng chung ah Khaikam khuapi hi aa tel mi a si i, mee peknak nawl a ngei mi minung 60000 leng an si tiah kan theih.
Cun, Tedim Peng chung, tutan thimnak ah ramkheel party 7 ZCD, CNLD, USDP, NLD, UBP, UDP le Tah-sah-ngiah party hna an i zuam lai tiah thawng kan theih.
