Tedim le Tonzang lothlo hna minung 879 sin ah COVID-19 chung a hlei in tangka cu July thla hramthok in Tedim Peng Farm Development Bank nih a cawih hna, tiah kan theih.
Tangka cawih ding in min a pe mi Tedim Peng khua 107 in lothlo minung 434, facang Acre 814, fangvui Acre 412 a dihlak ah Acre 1226 ca ah tangka sing 613, Tonzang Peng khuate komh 4 in lothlo minung 445, facang Acre 257 ca ah tangka Ks.12,850,000 cawih ding in an timh. Cu chung ah Tedim Peng khuate komh 5 chung in lothlo minung 108, facang Acre 43, fangvui Acre 270 ca ah Ks. 16,560,000 cawih an si cang, tiah Tedim Peng Farm Development Bank Manager Pu Thawng Khan sin in kan theih. Tangka an cawih ning hna hi facang le fangvui Acre pakhat ah Ks. 50,000 in cawih an si i, a miak cu kum khat ah zatuak 5% a si lai.
Tedim Peng Farm Development Bank Manager Pu Thawng Khan nih, “Tonzang Peng zong in an rat ahcun kan cawih ko hna lai, asinain atu tiang cu an kan pehtlai rih lo. Thawng cu kan thanh cang ko hna. Atu bantuk in tangka kan cawih mi hna cu, COVID-19 ruang ah lothlo pawl a hnunsuan sual hna lai tiah cunglei Bank nih a hlei cawih mi tangka tiah an ti i, kan cawihnak hna a si. Tangka cawih tik ah zulh ding phung phun 7 a tling mi le 2020 furpi tangka cawih cang mi hna cawihchap an si. Cham than tik caan hi a ra lai mi kum August thla 15 ah kan ti. A miak hi kum khat ah Acre pakhat Ks. 2500 a si. Acre 10 ah kum khat Ks. 25,000 a si,” tiah a chim.
Tedim Peng Saizang khuami pakhat nih, “COVID-19 ruang ah leng chuah khawh zong a si lo i, fangvui zong an par lio a si nain lo zong kan kal kho lo. Ni khat hlawh zong in rian kan tuan kho lo. Hi tangka an kan cawih mi hi, fangvui a zat hlan chung kan ei lai,” tiah The Hakha Post ah a chim. Tedim Peng Saizang khua hi inn 400 leng a um i, minung 2800 hrawng khua an saknak a si.
Photo/Taungzalat Time
