Tedim khua Pengkomh ngah nakding kan tawlrel cuahmah lio a si tiah Chin Ramkulh Chief Minisiter Salai Lian Luai sin in July 23 ah kan theih.
Chin Ramkulh Chief Minisiter Salai Lian Luai nih, “ Chief Minisiter ka ngah lecangka in Tedim, Tonzan le khua dang dang ka tlawng dih hna. Tedim le Tonzaang fonh in Pengkomh ah ser ding hi keimah pumpak zong in ka lung a tling tuk. Keimah nih Pengkomh peknak nawl ka ngei lo, a hal piak tu lawng ka si. Tedim Pengkomh pek ding in kan tawlrel cuahmah lio ah a cung lei nih Matupi hi a hlan Cozah nih an rak hal cang mi a si. Matupi Pengkomh ngahding in nan lung a tling maw an kan ti tikah Matupi nih Matupi siseh an ti, Paletwa nih Paletwa an ti khua dangdang zong an buai cio. Matupi hi cu a hlan Cozah nih an rak hal mi a si ca ah Kan hal hmasa hna lai a hnu ah khua dang kan in hal piak than hna lai kan ti hna hnu lawng an mi tam deuh nih an lungtling than. Kanmah nih a cunglei ah kan halpiak hna i a cunglei nih Matupi cu Pengkomh ah an pek cang,” tiah The Hakha Post ah a chim.
“Matupi pawl kha an khuachung Pengkomh Zung sak nakding ah hmunhma an i cuh. Matupi pawl zong a sau nawn an buai. Myanmar ram President Pu Henry Van Thio zong nih a kal hnawh hna i zapi lungtllinnak in a tuahpi hna. Matupi buaibainak a dih hnu in Tedim khua Pengkomh ngah nakding kan tawlrel. Cu lio ah Myanmar ram Ruahnakpetu Daw Aung San Suu Kyi Tonzaang ah a kal i anmah tein Pengkomh ngah nakding an hal. Cun, keimah zong nih ka chim than i nangmah cu halpiak kha na rian a si i pek le pek lo cu cunglei rian a si a ka ti. Atu zong ah Tedim Pengkomh ngah nakding in kan tawlrel lio a si,” tiah Chin Ram Kulh Chief Minister nih a chimchap.
Chin Ramkulh chung ah hin Pengkomh 4 le khuapi khua 9 a um. Pengkomh 4 hna cu Hakha Pengkomh, Falam Pengkomh, Mindat Pengkomh le Matupi Pengkomh hna an si.
