Tedim khuapi chung ah i kahdohnak a chuah nakhnga lo biaknak lei upa cheukhat cu nitin ti awk in khuahchung ah i chokvak in thla an cam hna, tiah theih a si.
Kha hlan deuh ah khan cun thlacamnak hi biakinn pakhatkhat ah an tuah tawn nain Tonzaang khua laak kahdohnak a chuah hnu in cun lampi ah an chuak i, lansone tibantuk ah i pum in thla an cam hna.
Tualchungmi pakhat nih, “Atu thlacamnak an tuah mi ah hin khuanu khuapa, zatlangbu upa hne le ramkhel lei upa hna an i tel mi kan hmuh hna lo. Mahle sang asiloah khrihfabu hna nih anmahte in thlacamtu bu an ser i atu bantuk hin thlacamnak an tuah mi a si,” tiah a chim.
Nizaan May 24 zong khan Tedim khua lai lamtonnak ah thlacamnak an pehzulh. Cu thlacamnak ah cun aa tel ve mi nu upa pakhat nih, “Kannih thlacam bu hi minung 18 kan si. Tedim khua a daih nakhnga le ral a thawh lo nakhnga biapi in thla kan cam,” tiah a chim.
Thlacamnak hi zinglei sml. 9 in zaanlei nitlak tiang an tuah tawn i a mi kip nih cu thlacamnak ah cun i tel khawh a si tiah sawmnak zong an tuah, tiah theih a si.
