Tedim ah Chokhlei kung hautu minung 4 Fort White Chokhlei phu nih ralrin pek Ted i m ramchung i a par mi Chokhlei kung a hautu minung pali hna cu Fort White Chokhlei Dawtu Phu nih ralrinnak an pek hna tiah kan theih. H i thawng he pehtlai in Forth White Chokhlei Dawtu Phu lutlai Salai KT Lian nih, “Ralrin kan pek mi minung 4 hi motorcycle in khual a tlawng mi an si.
Khuallam an tlun pah lamkam ah a par mi Chokhlei kung an hau. Motorcycle pakhat nih a kung in a hau mi a phurh i a dang pakhat nih a par le a ngiang khiah mi a phurh. Taingen khua, Tedim lampial Palek nih an tlaih hmasa hna i phone an kan chawnh dih hnu ah kanmah kan va kal. Atu hnu ah Chokhlei kung le a ngiang khiah ti lo ding in ralrin peknak ca kan pek hna.
Cun, ralrin peknak ca kan pek mi hna zeirel loin an um i an tuahkeel an tuah than a si ahcun phungning tein dan kan tat hna lai,” tiah The Hakha Post ah a chim. Fort White Chokhlei Dawtu Phu nih 2020 February thla chung ah Tedim kalnak motor lampi thluanchuak ah Chokhlei kung hau lo ding le a ngiang khiah lo ding in benh mi (Sticker) khualtlawng lamli mi hna sin ah an pek hna.
Cun, Fort White Chokhlei Dawtu Phu i chungtel Salai Tan Pi nih, “Hi kan phu hi a liamcia thla hnih hrawng ah kan dirh mi a si. Atu tiang ah Palek he ralrinnak kan pek mi hna hi minung pali an si i, Palek tel lo kanmah phu chung in minung 20 leng, Chokhlei kung an hau ruang ah ralrinnak ca kan pek hna,” tiah The Hakha Post ah a chim.
