Sagaing ramthen, Taze peng chung SAC column pawl cu February 21 in 24 tiang kan kah hna i ralkap 30 leng an thi tiah PDF No. 1 Military Division nih nihin, February 27 ah a thanh.
Taze khua in aa thawh mi LIB-361 battalion le Pyusawhtee 105 cu Khayanchian khuate pawng ah PDF nih an kah hna i 10 an thi, 9 hma an pu tiah an langhter.
Kanhtooma khuate in aa thawh mi LIB-11 le LIB-708 fonh SAC ralkap 50 hrawng cu Pekhingyi khuate pawng ah PDF nih an kah hna i paruk an thi, pasarih hma an pu tiah theih a si.
February 21 zong ah SAC ralkap, palek le Pyusawhtee 30 an umnak Kanhtooma khuate palek sakhan cu No. 1 Shwebo District Command in PDF pawl nih an laak i SAC lei in 11 an thi, 17 hma an pu. SAC nih vanlawng in kahdohnak voi 23 a tuah. PDF ralkap pakhat nih ram ca ah a nunnak a pek ve.
Palek sakhan laak kahdohnak ah G-3 zun 5, kut cheh bomb 4, MA-15 zenthong 1635, kuan bawm 12 le tangka Kyat sing 38 an laak khawh tiah an tial.
February 22 le 23 ah Kanhtooma khuate Chaklei ah LIB-11, LIB-708 battalion hna le Pyusawhtee 80 hrawng cu Shwebo pengkomh PDF battalion pawl nih an kah than hna caah SAC lei in 7 an thi i 15 hma an pu tiah PDF No. 1 Military Division nih a thanh.
Photo: No. 1 Military Division
