Sagaing ramthen, Taze peng, Shwetah khua pawng ah hmai a nawr mi Council ralhraang 100 hrawng le Taze PDF kar October 11 zing suimilaam 9 hrawng ah kahdohnak fak a chuak i Council ralhraang lei 20 nak tlawm lo an thi, hma pu 20 hrawng an si tiah Taze PDF sin in ka theih.
100 hrawng a si mi ralhraang le Pyo Saw Htee phukomh hna cu Bo Tisaih hruai mi Taze PDF, Shwebo pengkomh battalion 6, 7 le tualchung PDF tangti phukomh hna nih hriamngan, hriam hme le Sniper hna in kan kah hna, tiah raal hmai kal PDF pakhat nih Yangon Khit Thit Media ah a chim.
“Kan i kah thawk ah ralhraang ruak 6 an lak ka hmuh hna. Hmai an rak nawr chih ca ah bomb kan kamh mi an i pal pin ah hriam ngan le hriam hme he kan kah hna. Pali nak tlawm lo an thi than. 20 tluk hrawng hma pu an um. Sniper in pakhat a thi. A hlan kahdohnak zong ah an ruak an i chia ta bal lo an lak dih. Tette an thuh bia a si lai” tiah ral hmaikal PDF nih a chim.
Hmai a rak nawrchih mi ralhraang pawl cu Eainginpin tawyah pawng ah Shwebo pengkomh battalion 25(TPC) nih bomb an puah hna i ralhraang 10 hrawng an thi than tiah kan theih. Kahdohnak ah PDF phukomh lei him tein an kir kho. Council ralhraang pawl nih cun a thi mi ruak le hliam a tuar mi hna an phurh hna i Taze lei ah an kir than kan hmuh tiah tualchung mi nih an chim.
Council ralhraang le tualchung PDF phu komh hna cu Taze peng, Deyout khua pawng October 8 ah an rak i kap i PDF phu komh lei in 7 nih an nunnak an rak pek.
Source: Khit Thit Media
