HBA nih Loklung khua Triennial General Tonpumhnak ah Carson Hall a thar in sak than ding in biachahnak an ngei, tiah March 19 ah kan theih.
Hi kong he pehlai in “Carson Hall sak than kan timhnak a ruang cu, Carson hi Chinram Khualipi Hakha ah Pathian rian a kan tuanpiak mi le a lu aa phum mi philhlonak le upat peknak ca ah tiah tharchuah than ding in sak kan timh hi a si. Ramdang ahcun hall cu a tha tuk hringhran. Atu Carson hall belte a thing tuk cang ca ah tharchuah kan timh hi a si,” tiah HBA ah AGS Rev. Soe Paing nih The Hakha Post ah a chim.
Hi Carson Hall cu HBA ramchung mi nih sa kho usihlaw tiah saduhthahnak kan ngei. Carson Hall saknak kong ah tuanvo ngeitu ding committee zong kan ser cang hna. 2018-2019 tiang hi tangka kan kawl hmasa lai i, 2019 in sak hram kan thawk colh lai tiah a chimchap.
Hi Carson Hall sak nakding ah budget an tuak mi cu Ks. 500,000,000 (sing thong nga) dih in an suai. Atu sak thar ding mi hi dot khat lawng a si ko lai nain minung 3000 tlum in sak than ding in kan suai tiah a chimchap.
