India-Myanmar ramri, Tamu lei kahdohnak ah Manipur hriamtlai le Naga hriamtlai in ralkap tampi cu SAC ralkap lei ṭang in ral an do, tiah theih a si.
Tamu khua pawng ah a um mi Kyunpinthar le Mangsar ah a um mi SAC ralkap sakhaan pawl cu PDF nih January 27 in 29 tiang an doh i, cu kahdohnak ah cun Naga hriamtlai a si mi NSCN-IM le Manipur hriamtlai a si mi PLA (Meitei) in ralkap tampi nih SAC ralkap an bawmh hna, tiah theih a si.
“SAC ralkap lei ah Meitei tapung le Nanga tapung pawl an i tel. Atukar hrimhrim cu Kathe tapung hruaitu luzik lei tiang in an i tel,” tiah thawngpang hram minung pakhat nih People’s Spring ah a chim.
Tamu ah hin SAC ralkap bu lei in Kha-Lah-Yah (228) lawng an um nain Meitei tapung PLA le Naga tapung NSCN-IM in ralkap 500 hrawng nih an bawmh hna, tiah Tamu-PDF Battalion (4) nih thawngthanhnak ah an langhter.
January 27 in 29 tiang a cang mi nithum chung kahdohnak ah PDF lei in hliamhma a pu mi le a thi mi an um i, SAC ralkap, PLA le NSCN-IM lei zong in mithi le hliamtuar an tam, tiah theih a si.
