Kalay-Hakha motor lampi cung ah a um mi Taingen SAC ralkap sakhaan cu nihin January 16 zinglei ah CNA hruai mi ṭangrual Chin miphun ralkap hna nih tlamtling tein an laak khawh i, meithal zun 30 leng zong an laak, tiah thawng kan theih.
Taingen SAC ralkap sakhaan tukdohnak ah SAC ralkap 29 an thi, tiah CDF CDM-Siyin nih an chim i, ṭangrual Chin miphun hriamtlai lei in ralkap 8 an nunnak a liam ve.
Taingen SAC ralkap sakhaan cu January 12 thawk khan CNA, CDF CDM-Siyin, CDF-KKG, PDA, Chin Rifles (CR), TCDF, CDF-Zaniatram, CDF-Hualngoram, CDF -Thantlang le CDF-Hakha, hna nih an doh i, a ni nganak nihin zinglei ah tlamtling tein an laak khawh hi a si.
Taingen hi Kalay-Hakha-Falam le Kalay-Tedim-Rihkhawdar lei kalnak lamthluanpi cung ah a um mi a si caah khualtlawnnak, chawlehthalnak le raldohnak lei caah abiapi ngaimi khua a si.
