Atulio Social Media ti mi Facebook cahmai ah thawngpang a leng mi June 25 ah vanlawng fa mi Surbung Vanlawng bual ah a tum cang lai, tibantuk thawng hi a fiang lo mi a si, kanmah hmanh nih kan hngalh mi a si lo, tiah Chin Ramkulh Cozah Lamsuul Minister Pu Sui Thio nih June 22 ah a fianter.
“Kan hngal lo, ka ti tik ah riantuantu hna nih tutan zarh chung ah an lim ko lai. Cun, vanlawng zong cu a tum kho mi a si ko. Asinain, cu ni theng ah a tum lai, tibantuk kha kan hngal kho lo. A ruang cu COVID-19 ruang ah mibu um lo ding ti mi siseh, Ramkomh Cozah in upa hna an i manh le manh lo kong siseh, fuurpi a si bantuk in nikhua nih tah a kan dawnkhan lai maw, tibantuk siseh, a phunphun in a um tik ah cu ni theng ah ti cu chim khawh a si lo. Amah belte, a rauhhlan ah a tum cang lai, ti cu a fiang mi a si ko,” tiah Minister Pu Sui Thio nih The Hakha Post ah a chim.
Surbung Vanlawng bual cu 2015 kum in sak hramthok a si i 2020 June thla dih hlan ah lim timh i valawng fa mi ATR 72 phun zong tum ding in timhtuah a si. Amah belte, zeitik ah a tum lai, ti belte a fiang rih lo. Hi Vanlawng bual saknak ah Ks.34 billion hrawng a dih. Surbung Vanlawng bual cu rili in pe 6000 a sannak hmun ah sak mi a si i a tlik nakding lam pe 6000 a sau, pe 100 a kau mi a si, tiah kan theih.
Nihin The Hakha Post muitawn (June 22)
