Chin Ramkulh chung ah a thar sak i liim a si cang mi Surbung Airport honnak tuah dih hnu ah ram nih ngeih mi Myanmar National Airline nih Falam Surbung Airport in Yangon, Nay Pyi Taw, Mandalay le Kalay ah direct in vanlawng an kal lai tiah thawng kan theih.
Surbung Airport sak mi hneksaknak ca ah tiin 2020 October 27 ni ahkhan MNA nih ATR 72-600 minung 70 tlum in an rak tuah i, hi an tuahnak zong ah tlamtling tein vanlawng a tum kho tiah theih a si.
Hi kong he pehtlai in Myanmar National Airline i rian ngei Captain U Tan Tun nih, “2020 October 27 ni ahkhan pehzulh in a tum kho ding dirhmun a si maw timi hneksaknak kan tuah. Hi kan tuahnak ah tlamtling tein vanlawng zong a tum kho. Hmailei caan zong ah pehzulh in a tum kho ding dirhmun a si ko. Honnak an tuah dih hnu ah Yangon, Nay Pyi Taw, Mandalay le Kalay pawl in Falam Surbung Airport ah direct in kal a si lai,” tiah The Hakha Post ah a chim.
Falam Surbung Airport hi Falam khuapi in meng 8 a hlatnak hmun ah tuah mi a si. Cun, rili in pe 6000 sannak ah a ummi a si. Vanlawng a tliknak lam hi a sau pe 6000 le a kauh pe 100 a si i, Flexible Pavement phun in an tuah tiah theih a si.
