2020 kum thimnak ah hin teinak hmuh ding in kaa zuam cuahmah, asinain teinak lawng a um lo i sungh ding zong ah ready ka si thiamthiam i atu ka dirhmun Hluttaw Speaker theng ka si khawh ti lo zong ah miphun le ram ca riantuan tu hi kaa hmaithlak peng mi a si, tiah Chin Ramkulh NLD Chairman le atulio Hluttaw Speaker Pu Zo Bawi nih July 6 ah a chim.
Hiti bia a chim hi, cheukhat cu party EC nih Palai ca ah fehter lo mi hmanh an lungfak ngai, nang tah sungh ding ah ready na si kho maw, atu na thutdan hi phan ti hlah law zeitin, ti kan hal mi bialehnak ah a chim mi a si.
“Sungh ding ah ready ka si ko ka tinak cu, Ralkap uknak kha kan doh peng mi a si. Kum 20 le 30 tiang zei tangka hmanh pek loin mah thazaang tein ram kan kheelnak hi mizapi nih zalonnak kan hmuh nakhnga a si ko. Ni khatkhat ah Hluttaw Palai ka si lai, Minister ka si lai, tiin ruahchannak he kan tuan mi a si lo. Cun, Teinak ka hmu ko nain atu ka dirhmun theng ka phanh ti lo zong ah zeihmanh a poi ah ka chia lo. Kan ram le miphun nih an herh mi chimrel khawhnak lam a um poh ahcun cucu biatak tein ka tuan rih ko lai. Palai ka tlin poh ahcun mizapi nih kan herh mi hi kan hngalh tuk cang i a chimrel khotu si hi a biapi bik. A ngaingai cu ramkheel rian kan tuan, kan ti mi hi kanmah pumpak ca pakhat hmanh a si lo,” tiah The Hakha Post ah a chim.
Atu ah kan Palai cheukhat cu Hluttaw Meeting ah biatung hmanh an dirh kho lo. A poi taktak mi a si. Mizapi asiloah anmah meehmun minung zong zaangfak tuk an si. Hi bantuk Palai hi cu zeihmanh a thahnem lo. Cucaah, kei zong Palai ka tlin pohpoh ahcun atu ka dirhmun theng ka ti lo, mizapi ca ah chimrel khawh le an ca ah Palai si khawh ding hi biapi bik ah ka ruah mi a si, ti zong a cunglei upa nih a chim fawn
