Myanmar ramchung market ah sui fang khat tlai man cu March 22 ah Kyats sing 42 hrawng a si tiah ramchung media hna sin in theih a si.
Ralkap nih nawlngeihnak hramhram in a laak hlan ah sui fang khat tlai cu Kyats sing 13 hrawng a rak si. Kum thum fai chung ah Kyats sing 42 tiang a phanh caah sing 29 a kai tinak a si.
“Myanmar tangka man a zor tuk ruang le ram a buai ruang i sui aa khon mi an tam caah sui man a kai tuk nak a si,” tiah sui chawlettu pakhat nih Hakha Post ah a chim.
March 22, Ramdang market ah sui Ounce pakhat man cu US Dollar 2,174 a si.
Atu lio ramchung market ah sui fang khat tlai man cu Kyats sing 42 a si nain sui cawk zuarnak lei ṭhihruaitu phu Yangon Region Gold Enterpreneurs Association (YGEA) nih cun Kyats 3,795,000 in nan zuar lai tiah ri a khiah. Sui man ningcanglo in a kaitertu cu dan kan in tat hna lai ti zong 2024 March 16 ah a rak thanh.
