COVID-19 Chinram chung ah a karh lo nakhnga Chin Ramkulh chung mibu umnak, biakinn le lam pawl ah rungrul thahnak sii Sipin, Meithat le Ralkap i bawm in an kah tiah kan theih.
“Atu rungrul thahnak sii kan kah mi a sii hi sii-inn lei nih an kan pek i, Ralkap, Sipin le Meithat zung i bawm in kan kah. Meithat zung lei nih lam kam deuh hi tuanvo an lak. Sipin le Ralkap nih mibu umnak biakinn lei tuanvo kan lak,” tiah Sipin zung riantuan pakhat nih The Hakha Post ah a chim.
Rungrul sii kah hi 2020 March 29 in an thok i, Hakha khuachung Khrihfabu biakinn a tam deuh cu an kah pah dih cang. 2020 April 1 zong ah Minister Pu Pau Lun Min Thang le Minister Pu Soe Htet telh in RC biakinn le HBC biakinn ah rungrul thahnak sii an kah.
Rungrul thahnak sii kah kong he pehtlai in Minister Pu Soe Htet nih, “COVID-19 a karh lo nakhnga mibu umnak biakinn lei nih sii kahpiak ding in an kan hal a si ahcun kan kahpiak hna lai. Cun, tangka a dih ding mi zong Ramkulh Cozah lei nih tuanvo kan lak lai,” tiah Chin World ah a chim.
