Shan ramkulh Chaklei, Sinni khua hrambunh SAC ralkap headquarter pakhat a si mi OCH-16 (Operation Command Headquarters) hmunpi cu dohthlengtu ralkap phu komh nih an laak i, howitzer miakpi le armored vehicle tel in hriamnam chiahnak inn tiang an laak khawh tiah People’s Liberation Army (PLA) nih nihin ah a thanh.
Sinni khuapi cu “Operation 1027” aa thawk ni October 27 ah phu komh ralkap nih an rak laak cang mi a si i, khua leng ah a um mi OCH-16 hmunpi cu 2024 January 7 ah an laak hi a si.
OCH-16 hmunpi laak kahdohnak ah armored vehicle, Howitzer miakpi, Point 5 meithalpi hna tel in hriamnam kuanzen tampi an laak pin ah hriamnam chiahnak kudawng tiang an laak khawh tiah PLA nih a thanh.
Sinni khua leng ah a taang mi OCH-16 hmunpi cu January 1 in kah hram an rak thawk. OCH-16 tang ah a um mi IB-69 battalion cu January 4 ah an rak laak. LIB-240 battalion, LIB-323 battalion, Engineer ralkap le Sii lei ralkap hna cu Januray 6 zaan ah an zaam caah OCH hmunpi le a velchum dihlak cu phu komh ralkap nih an laak khawh, tiah cathanh ah an langhter.
Sinni khuapi cu SAC ralkap Headquarters pakhat a si mi East Nothern Military Command hmunpi umnak Lashio khuapi in meng 20 lawng aa hla mi khua a si.
Sinni khuapi laak kahdohnak cu Chaklei Unau Thum phu, People’s Liberation Army-PLA, KNDF, BPLA le Drone ralkap phu hna i bawm in an tuah mi a si tiah kan theih.
Photo: PLA
