Singapore ram ah rian a ṭuanmi Chin nutung no Cin Ngaih Uap (kum 31) cu August 18 ah a umnak inncung in a zuang i a nunnak aa la, tiah theih a si.
Cin Ngaih Uap hi Kalaymyo, Tahan ah a ummi Tedim lei mi a si i, Singapore a phaknak kum 8 a si cang, tiah Tedim lei thawngzamhnak nih an langhter.
“Cin Ngaih Uap hi a umnak Singapore inntek zong nih an dawt ngaingai. Suiṭhi le a dangdang a herhhaimi tiang in inntek in an zalhpiak,” tiah Singapore um naihniam a hawile nih an chim.
Cin Ngaih Uap a ruak cu nizaan August 20 ah khan sizung ah checknak an tuah i, Myanmar ram lei ah a umnak inntek nih kuat an timh.
“A ruak le a thilri vialte cu Myanmar ram lei ah kuat ding in inntek nih an tawlrelpiak dih. A ruak an zoh lio ah Cin Ngaih Uap a umnak inntek pa zong a ṭap len,” tiah Singapore um Myanmar rammi hna thawngthanhnak Group ah an ṭial.
Cin Ngaih Uap hi zei ruang ah dah a nunnak aa laak timi fiang in theih a si lo nain a nunnak aa laak hlan ah hin a hawi pakhat sin ah a tangka vialte a fanute a ngan tik ah pek te ding in a cah ta, tiah an langhter.
Cin Ngaih Uap hi fanute pakhat a ngeimi a si i, a fanute cu Tahan ah a um tiah theih a si.
