Hmuhning
By-Pa Pui
Sii-inn hi “mizaw inn” ti deuh ding hmanh a rak si. Sifak, mirum, bawi le chia ti um lo, lungdongh hnu ah puantom he fuhpanh cio mi inn a si––kan dam hlan lo kan inn a si.
Asinain zapi cu sii-inn ah damnak hmuh cu kan duh nain sikaan kan ngei lo. Mizaw hngaktu nih siseh, mileng nih siseh, cun amah mizaw hrimhrim nih siseh sii-inn sikaan kan zuul lo ngaingai hna. Cucaah mizaw ca lawng si loin, sii-inn riantuantu hna ca ah thilrit le zohchia ngai kan si tawn.
Mizaw pakhat kha a tam bik minung pahnih nih hngah ding mi kha chungkhar le hawikom ningpi hna in kan hngah. Mah vialte riah kha a hau lo. Siibawi le Nurse an um ko. A siningte ahcun inn zong ah mahti khan riah le buut kha a phung a si lo––mizaw damnak bawmtu si loin a zualtertu a si.
Chinmi cu mizaw zoh le hramh kha kan nunphung ah kan i chiah nain mizaw ca le sii-inn ca ah sikaan lonh in kan i hramh tik ah kan nunphung kha thilrit ah kan canter. Mizaw hngak nih sii-inn kha zu dinnak hmun le caantha laaknaka ah kan hman. Mizaw riah kha hawikom, ngaknu tlangval caantha laaknak ah kan hman. Zeitluk in dah sikaan kan ngeih lo ti cu zunput le sii-inn kam ah zuthawl le kuak, kunza haang nih tholung bantuk in a lunh mi nih a langhter.
Cheukhat nih zunput ah nu thidan le caku le hmunthur hna kan hlonh tik ah atu le atu a pit i mizaw le zapi harnak an tong. Cun, micheu nih zun dur in an zun kha inn cung in tang ah an hei thlet. A cheu nih inn cung in tang ah hmunthur an hlonh.
Sii-inn tual ah motorcycle le motor chiah lo nakding ah kan chiah. Cataar le tuanvo ngeitu nih chimh len zong ah ni khat chim lo chunhlan hmanh a daih lo. Riantuantu hna an kaazeet a thahnem lo. Mizaw le mizaw congtu zulh ding sikaan siseh, rawlpek le len cataar mi siseh zapi nih zoh le rel zong a um lo.
Micheu cu sii-inn ah ruat loin ihphah puan le belkheeng vei zat he lo riah bantuk in a rak pok mi zong kan um. Sii-inn hi mah inn bantuk in siarem tein khuasaknak hmun a si lo. Man tampi pek in umnak private sii-inn hna cu phundang. A cheu cu mah inn bantuk in zinglei saupi ih aa tim mi kan um. Nurse le hmunphiaktu nih an chimh hna tik hna ah kan zawtnak a kan thloptu an si ti tuak loin kan thangchiat rih hna.
Sii-in riantuantu hi a fel lo le mizaw lungtonglo an um ve ko lai. An cung ah ngaihchiat kan i timh ahcun an sikaan zeitluk in dah kan zulh khawh ve ti kha kan i tuak ngai a hau ve hnga. Cucaah kan inn i sikaan kan ngeih le kan i thianhhlimh bantuk in sii-inn ah sikaan ngeih le i thianhhlimh ve ah a tha. Kan inn i sikaan kan ngeih lo zong ah sii-inn ah cun ngeih ah a tha. Kannih nih ‘keimah voi khat ca tham ahcun’ ti in kan daithlaan mi kha sii-innpi le riantuantu ca ahcun zungzal a rak si.
Sii-innpi nih damnak a kan pe lo. Sii-bawite, nurse le hmunphiaktu hna thlopbulnak kha Pathian nih thlua a chuah hnu ah damnak kan hmuh mi a si ca ah anmah bochan in sii-inn a panhtu nih cun riantuantu hna zong upat usih law sii-innpi zong daw usih. Damnak man ah sikaan tal chuah khawh i zuam ve usih.#
