Chin Ramkulh, Falam pengkomh, Rihkhawdar khuapi i sii-inn ah rian a tuan mi sii-inn-uk telh in minung pathum sin ah COVID-19 zawtnak an hmuh ca ah caan karlak an kharpiak chung hna tiah Rihkhawdar Penguk Zung lutlai Pu Cing Lam Khai sin in thawng kan theih.
Rihkhawdar khuapi ah 2021 January 15 i zawtnak an hmuh mi dihlak minung panga an si. Hi chung ah Rihkhawdar sii-inn (taih-nay) Lutlai le sii lei sayama minung pahnih sin in zawtnak hmuh an si ve.
Hi kong he pehtlai in Pu Cing Lam Khai nih, “January 15 ahkhan Rihkhawdar khuachung in zawtnak hmuh mi minung panga an si. Hi minung panga chung ah sii-inn i rian a tuan mi minung pathum an i tel. Sii-inn ah rian a tuan mi hmuh an si tik ah, a taang mi riantuan pawl zong hi zumh thlu awk an tha ve lo. An ngei lai lo ti zong chim khawh a si lo. Sii-inn i rian a tuanmi hna sin in zawtnak hmuh a si tik ah, mizapi lei in sii-inn ah a rak i zoh mi le a rak i piah mi an um lo. Hi a si ca ah atu bantuk in caan karlak kan khar chung nak hi a si,” tiah The Hakha Post ah a chim.
Sii-inn chung i rian tuanmi a taang mi pawl zong an dihlak RTD in zawtnak an chek hna i a voi khatnak tiang cu Negative an si. Atu hnu voi khat an dihlak in chek than an si lai. Cun, sii-inn hi caan karlak khar a si ko nain, mizapi ngandamnak lei zohkhenh tu ding ah Falam sii-inn pi lei nih sii lei thiamsang minung panga an thlah hna tiah theih a si.
Falam sii-inn-uk Dr. Tluang Cung Thang nih, “Rihkhawdar sii-inn i rian a tuanmi hna chung in zawtnak hmuh a si tik ah caan karlak kharpiak chung an si. Caan karlak kharpiak chung an si ca ah mizapi lei ngandamnak zohkhen ding ah Falam sii-inn lei nih sii lei thiamsang minung panga kan thlah chung hna. Atu Rihkhawdar sii-inn rian a tuanmi an dihlak zong sii-inn ah Quarantine chiah beh an si i, January 20 ah a voi hnihnak zawtnak kan chek than hna lai,” tiah The Hakha Post ah a chim.
Rihkhawdar khuapi chung ah zawtnak hmuh mi dihlak minung paruk an si i, hi chung ah pakhat cu damnak a hmuh cang ca ah sii-inn in an chuahter cang tiah kan theih
Photo/ Chin World
