Thla khat deng a rau mi Karenni ramkulh, Shadaw khuapi laak kahdohnak ah SAC lei ralbawi hna tel in 160 leng an thi i hriamnam zun 150 leng le kuanzen tampi kan laak tiah KNDF nih nihin ah a thanh.
Shadaw khua kahdohnak cu January 15 in aa thawk i February 12 ah khuapi ning in an laak khawh. Cu chung ah cun SAC ralkap camp a si mi LIB-428, IB-249, Supply & Transport ralkap, Engineer ralkap le palek camp dihlak in Karenni ralkap nih an laak khawh.
Kahdohnak Colonel, Lt. Colonel, Major le palek Captain rank ralbawi hna tel in SAC lei 160 leng an thi i a nung in tlaih mi zong an um tiah an langhter.
kahdohnak chung ah KNDF le KA Karenni ralkap phu komh nih meithal zun 128, hriamnam ngan zun 18, Smoke Gun zun 3, Jammer Gun pakhat, pehtlaihnak seh pawl, kuanzen hna le ralkap thilri tampi kan laak khawh tiah an thanh.
Shadaw khuapi laak kahdohnak pawl ah SAC nih raltuknak vanlawng in voi 205 a kah hna. KNDF ralkap pathum le a dang phu in ralkap cheukhat nih ram le miphun caah an nunnak an pek tiah KNDF nih a thanh.
Photo: KNDF
