2023 September thla chung Karenni ramkulh ah Karenni Nationalities Defense Force (KNDF) le SAC ralhraang kar kahdohnak voi 29 a chuak i, cu kahdohnak pawl ah cun SAC ralhraang 78 an thi, hma a pu mi an tam tiah KNDF nih a thanh.
Karenni ramkulh huap kahdohnak ahhin SAC ralhraang meithal zun 36, hriamngan zun 5, kuanzen a phunphun kan laak hlei ah SAC ralhraang motor 2 kan khanghpiak hna i a dang motor pakhat zong bomh kan puah, SAC ralhraang panga a nung in kan tlaih hna tiah an langhter.
September thlachung ah SAC ralhraang nih Karenni ramkulh ah vanlawng in kahdohnak voi 20 a tuah caah khuami minung pasarih hma an pu. SAC hriamngan kah mi ruang ah khuami pakhat nunnak a liam i bomb rap an tunh mi lamhnak in khuami pakhat a nunnak a liam fawn.
SAC nih vanlawng in kahdohnak a tuah ruang ah Khrihfa Biakinn pakhat, Ngandamnak lei inn pakhat, khuami inn pakhat a rawk i, miakpi in an kah ruang ah inn hnih a rawk tiah an tial.
Hi September thla chung kahdohnak ahhin Karenni Nationalities Defense Force (KNDF) ralkap pariat nih ram ca ah an nunnak an pek tiah KNDF nih a thanh.
Photo: KNDF
