Hakha Khuanu Khuapa nih Senior General Min Aung Hlaing sin ah Hakha University kulhchung ah Chapel sak nakding le Paletwa kan unau hartong zawnruah ding an hal mi zeimawzat tlamtlin dawh a si, tiah kan theih.
“Khuanu Khuapa lei nih thil pahnih kan hal. Pakhatnak cu atu Hakha University kulhchung ah sak cuahmah mi Chapel kong hi a si. Hihi kan har ngai i na kan bawm kho hnga maw, tiah kan hal. Kaa zuam lai. A zeidang kan bawmh khawh hna lo hmanh ah tlakrawh le Mirang vawlei tal cu kaa zuam lai, a kan ti. Cun, pahnihnak ah Paletwa kan unau kong a si.
Photo : Dr. Salai Tluang Za Thang facebook
Facang tun khat ah Ks. 100,000 tiang a phan. Rawl-ei awk an ngei lo. An ngandamnak, an nunnak, an hnipuan fenh-aih tiang ah har tuk in an um mi hi na kan ruahpiak kho hnga maw, ti kan hal tik ah, kan tawlrel cuahmah ko. A si khawh chung in kan i zuam ko, tiah a kan leh i zeimawzat cu tlam a tling ko lai, tiah kan ruah,” tiah Hakha Khuanu Khuapa Secretary Pu Hrang Vung nih The Hakha Post ah a chim.
Photo : Dr. Salai Tluang Za Thang facebook
Senior General Min Aung Hlaing nih, “Hakha hi Ramthen-uk (tainghmu) ka si lio ka rak phanh he cun aa dang tuk. Nan thangcho ngaingai cang. Lungrual tein riantuanti usih. A bik in ciinthlaklei hi thazaang pe ulaw, a si khawh ahcun Ciinthlaklei Sianginn zong um sehlaw a tha tuk hnga,” tiah siaherh bia zong a chim, tiah a cunglei upa nih a chim fawn.
