Hakha University kulh chung ah Chapel sak ding in an timhlamh mi ca ah Myanmar ram Ralkap bawizik Senior General Min Aung Hlaing nih mirang vawlei (Cement) tun 1000 le Canphio 526 bawmhnak a pek hna tiah kan theih.
“Senior General Min Aung Hlaing Hakha a rak tlun lio ahkhan atu Hakha University Chapel sak nakding lawng kan hal mi si loin, Rakhine hriamtlai phu AA le anmah ralkap kahdohnak ruang i harnak a tong mi, ralzaam hna ca zong bawmhnak kan hal chih. Ralzaam hna ca ah kan hal mi hi lehnak cu a um rih lo. Hakha University Chapel saknak ca ah bawmh kan hal mi tu cu mirang vawlei tun 1000 le canphio tlap 526 ah an kan pek. Adihlak in phan cang nain tuanvo latu hna kut ah a phak le phak lo tu cu fianglak in kan thei kho lo. Mirang vawlei le canphio an kan bawmh mi nih hin a inn pi ning in a nguhdeih lai. Kanmah nih cu zat kha zat in kan bawm tiah kan hal lo. Amah nih a innpi ning in a herhbau mi kha cazin ka kua ulaw kai rak i tum dih lai tiah an kan ti. Cun, hi chapel sak nakding hi HCMF le Hakha University lutlai Dr. Lian Za Khup tawlrelnak in sak mi a si,” tiah Hakha Khuanu Khuapa Chairman Pu Siang Mang nih The Hakh Post ah a chim.
Atu Hakha University Chapel hi Myanmar Kyat sing 1500 dih in sak an timh mi a si i, a hmun zong an chunh dih cang tiah kan theih.
