Kum caan saupi ngiar mi le kheel peng mi 2008 phunghram remh ding cu Nay Pyi Taw ah tuah mi a voi 20nak, Union Peace Dialogue Joint Committee (UPDJC) meeting a dih ah Senior General Min Aung Hlaing nih, “Ka lungtling ko, kan remh ko lai,” tiah Media sin thawngfianhnak ah a chim.
“Atu bantuk in Ralkap Lutlai Senior General Min Aung Hlaing nih a chim hi Rampi Kahdaihnak Minthut (Nationwide Ceasefire Agreement) ah min a thut cang i atu UPDJC meeting a dih hnu Media sin thawngfianhnak ah a chim mi a si,” tiah State Counselor’s Office in Director General le President Office Spokesman U Zaw Htay nih RFA sin ah a chimchin mi a si.
“NCA ah kan i tel mi hi a ngaingai cu 2008 phunghram remh ding zong aa tel mi a si. Ralkap zong nih 2008 phunghram hi kan remh hrimhrim lai tiah bia kan kamh (commitment) hna. NCA ah min kan thut ti mi cu kahdaihnak a si pin ah 2008 phunghram remh ding zong hi a sichih. Hi zong hi kan zapi tonbiaruahnak in a chuak mi a si ca ah thiltha a chuahpi fawn lai. Zeidang lam tampi a um ko lai nain kanmah Ralkap nih phunghram remh ding kong hi NCA ah aa tel cang mi zong a si fawn,” tiah Senior General Min Aung Hlaing nih Media sin ah a chim.
Tutan Kumzabu 21 Panglong tonpumhnak cathluan a chuahpi mi le a biachimnak ahcun Tlangcungmi cheukhat an lungdong ngai nain, atu bantuk in Media sin thawngfianhnak ahcun 2008 phunghram hi kan remh ko lai, tiah General Min Aung Hlaing nih a chim.
