Hakha ah Sangthar samh mi hi a voi khatnak minung 500 hrawng nih tinco ding a si i a thar in sok than si loin, tuan deuh ah a sok mi hna chung in a tingco bak ding thim cang mi hna nih a hmunhma an tin ding soknak form lak ding kan ti mi a si, tiah Chin Ramkulh Cozah Minister Pu Sui Thio nih June 19 ah a fianter than.
Hakha ah Sangthar samh mi cu a voi khatnak minung 500 hrawng nih tinco ding a si i soknak form (sohhlua) cu June 19 in 22 tiang lak khawh a si. Hmun a tingco ding mi min cazin cu Hakha Peng Sipin Zung, Sang Khuabawi Zung hmun 8 ah zinglei suimilaam 9:30 in zaanlei 5:00 tiang an taar i zoh khawh a si. Cun, soknak form zong lak khawh a si, tiah kan theih.
“June thla dih hlan hrimhrim ah awngbali zuhter an si lai. Atu soknak form lak ding kan ti mi cu a tingco bak ding in thim cang mi nih 1st class maw, 2nd class maw, 3rd class maw, a tinco ding mi hmun awngbali zuhnak form khi a si. Tuanpi khan a rak sok mi dihlak nih an tingco lai lo. Inn 10 uk, inn 100 uk, Sang khuabawi tibantuk le La-Wa-Ka tibantuk nih felfai tein an zohfel i an lungtlin mi lawng kha cohlan an si. Inn hlang bak mi, inn ngei lo bak mi, Hakha ah kum 20 maw kum 10 maw a um bak mi, tibantuk le tinco awk aa tlak bak mi nih tinco le tinco awk aa tlak lo mi nih an tinco sual ding hi kan phan tuk mi a si. Atu hi a voi khatnak a si lai i a voi hnihnak zong rianrang tein kan phawtzamh thiamthiam lai,” tiah Minister Pu Sui Thio nih The Hakha Post ah a chim.
Hi hmun a ting mi nih July 15 khi a hnu bik chia in tangka a ap hrimhrim lai. Hi Sangthar hi zeitik nicaan theng ah awngbali zuhter le phawtzamh ding a fiang lo nain, June thla dih hlan ah a si lai, tiah kan theih.
