Hakha Sangthar samh mi acre 676 chung ah acre 487 cu a voi khatnak July 1 in 3 tiang awngbali zuh a si lai i a taang mi zong July thla chung thiamthiam ah awngbali zuh a si than lai, tiah June 26 ah kan theih.
Awngbali zuh cu July 1 in 3 tiang, Hakha Town Hall (Myodaw Khanma) ah zinglei suimilaam 9:00 in zaanlei 5:00 tiang a si lai. Awngbali a zuk ding mi hi a Sang in then an si te kho men i Hakha ah kum 20 le kum 10 in a cunglei a um cang mi hna kha papek in zuhter hmasa an si lai, tiah kan theih.
Hakha Peng Sipin Committee Chairman Pu Ngun Vung nih, “Tutan a voi khatnak hi July 1-3 ah aa lim lai. A voi hnihnak hi July thla chung thiamthiam ah rianrang tein kan phawtzamh than lai. A voi hnihnak zong hmun a tingco ding mi min cazin kha kan taar than lai i awngbali an zuh ve lai. A voi khatnak a zuuk ding mi hna hi chungkhar 487 an si nain 30 hrawng nih an sok thai lo ca ah June 25 in 30 tiang khi sok khawh rih ding in a nicaan kan thawnpiak than hna. Atu ah hmun a tingco bak ding le awngbali a zuk ding mi hna hi chungkhar 455 hrawng an si,” tiah The Hakha Post ah a chim.
Hi hmun a tingco mi hna nih July 15 hlan hrimhrim ah anmah le hmun tinco mi zat tangka an thawh dih lai. Hi tangka thawh ti mi hi lam cawhnak, lam lungphahnak, ti, mei le a herh mi thil vialte kha a ba in tuah an si i an thawh mi in rulh te ding a si, tiah kan theih.
